E përditshmja maqedonase “Fokus” ka hedhur në dritë fakte të reja lidhur me planet qeveritare dhe të Kishës Ortodokse Maqedonase. Sipas kësaj të përditshmeje, qeveria maqedonase, në krye me Nikolla Gruevskin, tashmë është duke u përgatitur për një kampanjë të re – atë të ndërtimit të objekteve kishtare, transmeton Almakos.

Në shkrimin e kësaj të përditshmeje, me titull “Kishat duhet t’i mundin xhamitë” pretendohet se kryetarët e komunave tëshmë i kanë marrë instruksionet nga partia e tyre që në maksimum t’i përshpejtojnë procedurat për ndërtimin e kishave.

Aktualisht, në Maqedoni janë të regjistruara 1842 kisha ortodokse krishtere në pronësi të Kishës Ortodokse Maqedonase dhe 580 xhami në pronësi të Bashkësisë Fetare Islame.

Këto të dhëna janë pjesë e publikimit të ri "Harta e objekteve fetare në Republikën e Maqedonisë" të botuar gjatë vitit të kaluar nga Komisioni për marrëdhënie midis bashkësive fetare dhe grupeve religjioze. /Almakos/