Pyetje dhe përgjigje të ndryshme, përgjigjet Mr. Bashkim Aliu

PYETJA: A bën t’i jepet zeqati një personi që punon dhe merr rrogë mujore, por ankohet vazhdimisht se nuk i del rroga?

PËRGJIGJA: Zeqati është obligim fetar fondet e destinimit të të cilit janë të përcaktuara qartë në Kur’anin famëlartë. U takon njerëzve të varfër dhe atyre të cilët kanë mungesë të mjeteve materiale, ashtu që nuk mund t’i mbulojnë harxhimet e tyre familjare. Ndodh që kjo të jetë si rezultat i numrit të madh të fëmijëve, rrogës së vogël, standardit të lartë jetësor, e kështu me rradhë.

Së këndejmi, nëse një person është i punësuar dhe merr rrog, por kjo rrog nuk i mjafton t’i mbuloj harxhimet mujore të familjes së tij, është e lejuar që t’i jepen mjete nga zekati, me kusht nëse ai nuk është harxhues i tepërt, gjegjësisht nuk harxhon para pa masë dhe në gjëra që nuk janë të nevojshme për jetesë.

Allahu e di më së miri.

PYETJA: Nëse një person gjatë jetës ka bërë mëkat, konkretisht fjalën e kam për zinanë, ashtu që nga kjo lidhje jashtmartesore me një grua i ka lindur fëmijë. Ai e di se ky fëmijë është i tij, po ashtu edhe fëmijët që i ka legjitim e dinë këtë gjë, por ai nuk ka qenë në niqah me femrën e cila e ka lindur këtë fëmijë. Ky është fëmijë i tij vetëm në aspektin biologjik. Tash, a i takon fëmijut jashtmartesor trashigimi nga personi në fjalë?

PËRGJIGJA: Së pari, besimtari duhet të jetë i kujdesshëm gjatë jetës së vetë dhe me çdo kusht duhet t’u largohet mëkateve dhe harameve që na i ka ndaluar Allahu, ngase ato nuk sjellin dobi për njeriun, por vetëm dëm dhe gjëra negative. Allahu i Madhërishëm në Kur’an ka thënë:'' Dhe mos iu afroni imoralitetit (zinasë), sepse vërtet ai shtë vepër e shëmtuar dhe është një rrugë shumë e keqe '' (El-Isra’, 32). Zinaja sjell probleme të mëdha edhe në aspektin shoqëror dhe familjar, shkakton komplikime në jetën bashkëshortore dhe familjare të njeriut si dhe në shoqëri në përgjithësi.

Në rastin në fjalë, fëmiju është i gjakut të tij vetëm në aspektin biologjik, por jo edhe në aspektin ligjor. Nga aspekti fetar, ky fëmijë nuk i atribuohet personit në fjalë dhe nuk thuhet se ky djal është djal i atij personi, por ngelet të thirret në emër të nënës.
Së këndejmi, nga aspekti i sheriatit, ky fëmijë nuk ka të drejtë të trashigojë nga ky person që është baba biologjik i tij.

Mirëpo, dijetarët kanë përmendur se pasi ky fëmijë është fëmijë biologjik i tij, atëherë është mirë që personi në fjalë që është prind biologjik, të len testament që sa i takon këtij fëmije nga trashigimia e tij, ta merr pas vdekjes.

Allahu e di më së miri.

PYETJA: E kam dëgjuar dhe lexuar një hadith ku tregohet se e kanë pyetur të dërguarin e Allahut për një grua që është falur, por i ka shqetësuar fqinjët me fjalë. Ai ka thënë se ajo është në xhehenem. Po ashtu, e kanë pyetur për një grua që nuk është falur shumë, por nuk i ka shqetësuar fqinjët me fjalë, e ai ka thënë se është në Xhenet. Si mund të kuptohet ky hadith kur i kemi parasyshë hadithet që flasin për rëndësinë e namazit?

PËRGJIGJA: Ky hadith është si vijon: Ebu Hurejre ka rrëfyer se një burr të dërguarit të Allahut s.a.v.s. i ka thënë:”O i dërguar i Allahut, filan gruaja falë shumë namaz, jep shumë sadaka, agjëron shumë, por fqinjët i mundon me gjuhën e saj?” I dërguari i Allahut s.a.v.s. ka thënë:”Ajo është në zjarr”.

I njejti person, përsëri të dërguarin e Allahut e ka pyetur:”O i dërguar i Allahut, filan gruaja është përmendur se agjëron shumë pak dhe fal shumë pak namaz, jep shumë pak sadaka, por ajo nuk i shqetëson fqinjët?” I dërguari i Allahut ka thënë:”Ajo është në Xhenet”. Hadithin e ka transmetuar Ahmedi dhe disa tjerë.

Hadithi në fjalë tregon se dikush e ka pyetur të dërguarin e Allahut s.a.v.s. për sjellje të caktuara të këtyre grave. Në këtë rast, i dërguari i Allahut s.a.v.s. i është përgjigjur atij. Përgjigja e dhënë, nuk përmban vërejtje dhe urdhëra për të falur namaz, për të agjëruar e për të dhënë lëmoshë, edhe pse namazi dhe agjërimi janë farze. Kjo argumenton se pyetja nuk është parashtruar për lënien e namazit farz, të agjërimit farz apo të ndonji farzi tjetër. Sikur kjo grua mos e kishte falur namazin farz, apo sikur mos e kishte agjëruar agjërimin farz, para se të fliste për fyerjen e fqinjve, i dërguari i Allahut s.a.v.s. do të bënte vërejtje për lënien e këtyre obligimeve, ngase është absurde që në prezencë të tij të flitet për dikë që i len pas dore farzet, e ai mos të bëjë vërejtje, apo të flet për çështje tjera e t’i len farzet.

Namazi dhe agjërimi farz, nuk mund të lehen nga një person dhe i njejti të cilësohet që në këtë botë si xhenetli. Kjo do të ishte nxitje për lënie të farzeve, do të krijonte përshtypje se farzet edhe nëse lihen nuk do të thotë gjë, si dhe do të ishte në kundërshtim me hadithet tjera të cilat e theksojnë në veçanti vlerën e namazit.

Së këndejmi, në këtë hadith është për qëllim namazi nafile e jo namazi farz. Pra, kur ka thënë se ajo falet shumë pak, e ka për q[llim se ajo fal shumë pak namaz nafile e jo fal shumë pak namaz farz.

Allahu e di më së miri.